१. सुनका गहना चोरी गर्ने दुई जना पक्राउ
पर्वतको फलेवास नगरपालिका–५ खानीगाउँकी ५२ वर्षीया सन्तु नेपालीको हत्या गरी सुनका गहना लुटिएको घटनामा २८ वर्षीय कुशल पुरी र चोरीको गहना खरिद गर्ने स्मृति ज्वेलरी उद्योगका सञ्चालक रमेश कुमार श्रेष्ठलाई प्रहरीले पक्राउ गरेको छ। घटनापछि १० वटा सुनका टप र एउटा सिक्री लगिएको थियो। प्रहरीले अभियुक्तबाट अधिकांश गहना बरामद गरी थप अनुसन्धान अघि बढाएको छ।
२. ३६८ वटा चौरीको पुच्छरसहित ट्र्याक्टर नियन्त्रणमा
प्रहरीले मकालु गाउँपालिका–३ हेदाङ्नामा अवैध रूपमा ओसारपसार भइरहेको ३६८ वटा चौरीको पुच्छर बोकेको ट्र्याक्टर नियन्त्रणमा लिएको छ। वन्यजन्तुसम्बन्धी सामग्री अवैध रूपमा संकलन र ढुवानी भइरहेको सूचनापछि गरिएको कारबाहीमा उक्त सामग्री बरामद गरिएको हो र घटनाबारे थप अनुसन्धान भइरहेको छ।
३. न्युरोडबाट ४० लाख रुपैयाँ नगदसहित एक व्यक्ति पक्राउ
काठमाडौंको न्युरोड क्षेत्रबाट स्रोत नखुलेको ४० लाख रुपैयाँ नगद बोकेर हिँडिरहेका स्वरुपराज दवाडी नाम गरेका व्यक्तिलाई प्रहरीले पक्राउ गरेको छ। ठूलो परिमाणको नगदसहित भेटिएका व्यक्तिमाथि रकमको स्रोत र प्रयोगबारे अनुसन्धान सुरु गरिएको छ।
४. झापामा फरार रहेका २४ अभियुक्त पक्राउ
विभिन्न अपराधमा अदालतबाट सजाय वा फैसला भई फरार रहेका २४ जनालाई झापा प्रहरीले पक्राउ गरेको छ। उनीहरूलाई जिल्लाका विभिन्न स्थानबाट नियन्त्रणमा लिई कानुनी प्रक्रियाअनुसार सम्बन्धित निकायमा बुझाइएको प्रहरीले जनाएको छ।
५. दार्चुलामा ३९ बोरा गाँजासहित चार जना पक्राउ
दार्चुलामा प्रहरीले ३९ बोरा गाँजासहित चार जनालाई पक्राउ गरेको छ। अवैध लागूऔषध ओसारपसार भइरहेको सूचनाका आधारमा गरिएको कारबाहीमा ठूलो परिमाणको गाँजा बरामद गरिएको हो। पक्राउ परेकामाथि लागूऔषधसम्बन्धी कसुरमा अनुसन्धान भइरहेको छ।
६. एकै दिन ट्राफिक कारबाहीबाट १ करोड ८८ लाख रुपैयाँ राजस्व संकलन
काठमाडौं उपत्यकासहित देशका विभिन्न स्थानमा ट्राफिक नियम उल्लंघन गर्ने सवारीसाधनमाथि गरिएको कारबाहीबाट एकै दिन १ करोड ८८ लाख १० हजार रुपैयाँभन्दा बढी राजस्व संकलन भएको छ। हजारौं सवारीसाधनलाई कारबाही गर्दै ट्राफिक प्रहरीले नियम पालना गराउन अभियान सञ्चालन गरिरहेको जनाएको छ।
७. ४० हजार रुपैयाँ घुस लिएको आरोपमा नासु पक्राउ
अख्तियार दुरुपयोग अनुसन्धान आयोगको टोलीले ४० हजार रुपैयाँ घुस लिएको आरोपमा भूमि प्रशासन कार्यालय मनाङमा कार्यरत नायब सुब्बा ज्ञानराज कँडेललाई रंगेहात पक्राउ गरेको छ। सेवाग्राहीसँग काम मिलाइदिने भन्दै रकम मागेको सूचनाका आधारमा गरिएको अपरेशनमा उनी पक्राउ परेका हुन्।
८. ललितपुरमा कारको टायरमा गोली हानी लागूऔषध बरामद
ललितपुरमा प्रहरीले शंकास्पद कार रोक्न खोज्दा चालक नरोकेपछि टायरमा गोली प्रहार गरी कार नियन्त्रणमा लिएको छ। त्यसपछि गरिएको खानतलासीमा २० हजार क्याप्सुल लागूऔषध बरामद भएको प्रहरीले जनाएको छ। बाराका ३५ वर्षीय जितेन्द्र पासवान तथा भारतीय नागरिकहरू ३२ वर्षीय अहमद लड्न र ३३ वर्षीय महमद सद्दामलाई नियन्त्रणमा लिएको छ भने उनिहरूमाथि अनुसन्धान जारी छ।
९. जेन्जी आन्दोलनका बेला भागेका पाँच कैदी पुनः पक्राउ
जेन्जी आन्दोलनका क्रममा कारागारबाट भागेका कैदीलाई प्रहरीले पुनः पक्राउ गरेको छ। नख्खु कारागार भागेका डाँका चोरी मुद्दाका फरार कैदी दोलखा सैलुङ गाउँपालिका-८ का ४४ वर्षीय सुनिल श्रेष्ठलाई पक्राऊ गरिएको हो। फरार भएपछि विभिन्न स्थानमा लुकेर बसेका उनलाई खोजतलास गरी नियन्त्रणमा लिइएको र आवश्यक कानुनी प्रक्रिया अघि बढाइएको छ।
१०. पर्सामा १०० किलो गाँजा बरामद
पर्सा जिल्लामा प्रहरीले करिब १०० किलो गाँजा बरामद गरेको छ। अवैध रूपमा भण्डारण गरिएको लागूऔषध विशेष सूचनाका आधारमा फेला पारिएको हो। घटनामा संलग्न व्यक्तिको खोजी तथा थप अनुसन्धान जारी रहेको प्रहरीले जनाएको छ।
यी घटनाहरू हेर्दा चोरी, लागूऔषध कारोबार, घुस, अवैध नगद कारोबार, तस्करी तथा अन्य अपराधमा नगद अर्थतन्त्रले सहज वातावरण उपलब्ध गराएको देखिन्छ। ठूलो रकमको नगद सजिलै लुकाउन, घुस दिन, अवैध कारोबार गर्न र अपराधबाट प्राप्त रकम परिचालन गर्न सकिने भएकाले यस्ता गतिविधि नियन्त्रण गर्न कठिन भइरहेको छ। दैनिक उपभोगका सामग्री खरिदका लागि भने नगद अनिवार्य छैन, किनकि डेबिट कार्ड, क्यूआर कोड, मोबाइल बैंकिङ तथा अन्य डिजिटल माध्यमबाट सामान्य आर्थिक गतिविधि सञ्चालन गर्न सकिन्छ।
त्यसैले अपराध, भ्रष्टाचार र अवैध आर्थिक गतिविधि नियन्त्रण गर्न सरकारले नोट खारेजीको दीर्घकालीन नीति अपनाउनुपर्ने आवश्यकता देखिन्छ। सबै पसल तथा सेवा क्षेत्रमा अनिवार्य डेबिट कार्ड, पीओएस मेसिन र डिजिटल भुक्तानी प्रणाली लागू गरिएमा सर्वसाधारणको दैनिक जीवन प्रभावित नहुने, तर नगदमा आधारित अपराध, घुसखोरी, कालोधन र तस्करी नियन्त्रण गर्न महत्त्वपूर्ण सहयोग पुग्नेछ। नगदरहित र पारदर्शी अर्थतन्त्रतर्फको रूपान्तरणले सुशासन तथा कानुन कार्यान्वयनलाई समेत थप प्रभावकारी बनाउन मद्दत गर्नेछ।
