बुटवलको अमरपथस्थित तिनाउ सुनचाँदी पसलमा चोरी भएको छ। पसलबाट करिब ८० तोला सुनका गरगहना चोरी भएको बताइएको छ, जसको मूल्य करिब साढे २ करोड रुपैयाँ बराबर हुन सक्ने अनुमान गरिएको छ। पसल सञ्चालक बाहिर रहेको र सीसीटीभी क्यामेरा बिग्रिएको समयमा चोरी भएको प्रारम्भिक अनुसन्धानबाट खुलेको छ। चोरले विभिन्न चाबी प्रयोग गरी लकर खोलेर सुन चोरी गरेको प्रहरीले जनाएको छ र घटनाबारे थप अनुसन्धान जारी रहेको छ।
सुनचाँदी व्यवसायमा ठूलो परिमाणमा नगद कारोबार हुने प्रवृत्तिले यस्ता अपराधलाई आकर्षित गर्ने वातावरण सिर्जना गर्छ। चोरीको मुख्य उद्देश्य अन्ततः आर्थिक लाभ नै हो। चोरी भएका सुनका गहना नगदमै बिक्री गर्ने, नगदमा रूपान्तरण गर्ने वा अनौपचारिक बजारमार्फत कारोबार गर्ने सम्भावना बढी हुन्छ। नगद अर्थतन्त्र बलियो हुँदा चोरीका वस्तुहरूको अवैध कारोबार र रकमको स्रोत लुकाउन सहज हुन्छ। यदि सुन खरिद बिक्रीदेखि भुक्तानीसम्म सबै प्रक्रिया डिजिटल अभिलेखमा आधारित हुने हो भने चोरीपछिको अवैध आर्थिक गतिविधि नियन्त्रण गर्न धेरै सजिलो हुन सक्छ।
यसकारण सरकारले नोट खारेजीतर्फ स्पष्ट रोडम्याप बनाउनु आवश्यक छ। सुनचाँदी पसल, मूल्यवान वस्तुको व्यापार तथा अन्य उच्च मूल्यका कारोबारमा पूर्ण डिजिटल भुक्तानी अनिवार्य गरिनुपर्छ। QR, POS, मोबाइल बैंकिङ तथा बैंक ट्रान्सफरमार्फत कारोबार हुँदा प्रत्येक लेनदेनको रेकर्ड रहन्छ। यसले चोरी, सम्पत्ति शुद्धीकरण तथा अवैध कारोबार नियन्त्रणमा सहयोग पुर्याउनेछ र व्यवसायलाई थप सुरक्षित बनाउनेछ।
