देशका विभिन्न स्थानमा सञ्चालन गरिएको विशेष अपरेशनका क्रममा लागुऔषध नियन्त्रण ब्यूरोले ५५९ ग्राम खैरो हेरोइनसहित १० जनालाई पक्राउ गरेको छ। पक्राउ परेका व्यक्तिहरू काठमाडौँ, पोखरा, नेपालगञ्ज र सुर्खेत लगायत विभिन्न स्थानबाट समातिएका हुन्। प्रहरीले उनीहरूको साथबाट ठूलो परिमाणमा नगद रकम, डिजिटल तराजु र लागूऔषधसम्बन्धी सामग्री बरामद गरेको जनाएको छ। अनुसन्धानका क्रममा लागूऔषधको सञ्जाल, स्रोत र वितरण प्रणालीबारे थप अनुसन्धान भइरहेको बताइएको छ।
यो घटना केवल लागूऔषध नियन्त्रणको विषय मात्र होइन, नगदमा आधारित अर्थतन्त्रले कसरी अवैध कारोबारलाई सहज बनाउँछ भन्ने उदाहरण पनि हो। लागूऔषधसँगै १६ लाखभन्दा बढी नगद बरामद भएको तथ्यले अपराधी समूहहरू किन नगद रोज्छन् भन्ने देखाउँछ। बैंकिङ प्रणालीभन्दा बाहिर रहने यस्तो नगद कारोबारले स्रोत पहिचान गर्न कठिन बनाउँछ। त्यसैले नोट खारेजीको नीति तथा पूर्ण डिजिटल कारोबार प्रणालीको आवश्यकता झन् स्पष्ट भएको छ। नयाँ सरकारले विगतका सरकारजस्तै केवल पक्राउमा सीमित नबसी अपराधको आर्थिक आधार कमजोर बनाउने दिशामा काम गर्नुपर्छ।
लागूऔषध कारोबारलाई तुरुन्त पैसा स्थानान्तरण, रकम लुकाउन र प्रमाण मेटाउन नगद आवश्यक हुन्छ। तर सामान्य नागरिकलाई दैनिक खाद्यान्न, यातायात वा साना खर्चका लागि सुविधा पनि आवश्यक हुन्छ। त्यसैले नोट खारेजीसँगै सरकारले सबै किराना पसल, होटल, तरकारी बजार र सार्वजनिक सेवामा अनिवार्य डेबिट कार्ड वा डिजिटल भुक्तानी प्रणाली लागू गर्न सक्छ। साना व्यवसायीलाई निःशुल्क POS मेसिन, न्यून बैंक शुल्क र कर छुट दिन सकिन्छ। यसरी दैनिक जीवन प्रभावित नगरी लागूऔषधजस्ता अपराधको आर्थिक सञ्जाल कमजोर बनाउन सकिन्छ।
