काठमाडौं उपत्यका ट्राफिक प्रहरी कार्यालयले विभिन्न स्थानबाट चोरी भएका ४० वटा दुई पाङ्ग्रे सवारीसाधन फेला पारी सम्बन्धित धनीलाई हस्तान्तरण गरेको छ। फेला परेका सवारीमध्ये २५ वटा मोटरसाइकल र १५ वटा स्कुटर रहेका छन्। कतिपय सवारीमा नक्कली नम्बर प्लेट प्रयोग गरिएको थियो। ट्राफिक प्रहरीले गत साउनयता सयौँ चोरी भएका सवारीसाधन फेला पारेर धनीलाई बुझाइसकेको र चोरीमा संलग्न दर्जनौँ व्यक्तिलाई नियन्त्रणमा लिएको जनाएको छ।
सवारी चोरीको अपराधमा पनि नगद अर्थतन्त्र महत्वपूर्ण कारकका रूपमा देखिन्छ। चोरी गरिएका मोटरसाइकल र स्कुटरहरू प्रायः कागजातबिनै सस्तो मूल्यमा नगदमा बिक्री गरिन्छन्। नगद कारोबारमा खरीदकर्ताको स्पष्ट आर्थिक पहिचान नहुने भएकाले अपराधीहरूलाई बजार भेट्टाउन सजिलो हुन्छ। यदि सवारी खरिद-बिक्री तथा पार्टपुर्जाको कारोबार पूर्ण रूपमा डिजिटल र अभिलेखीकरण गरिएको भए चोरीका सवारी बेच्न निकै कठिन हुने थियो। सामान्य जनजीवनका लागि भने क्यूआर, मोबाइल बैंकिङ र कार्ड भुक्तानी पर्याप्त विकल्प हुन्।
त्यसैले सरकारले नोट खारेजीतर्फ चरणबद्ध योजना ल्याएर सवारी तथा अन्य मूल्यवान सम्पत्तिको खरिद-बिक्री डिजिटल माध्यमबाट मात्र हुने व्यवस्था गर्नुपर्छ। सबै आर्थिक कारोबारलाई डिजिटल ट्र्याकभित्र ल्याउन सके चोरीका सवारीको अवैध बजार नियन्त्रण हुने, राजस्व पारदर्शिता बढ्ने र अपराधबाट आर्जित रकम लुकाउन कठिन हुने अवस्था सिर्जना हुनेछ।
