सुदूरपश्चिम प्रदेशका विभिन्न स्थानबाट एकै दिन ८ जना लागुऔषधसहित पक्राउ परेका छन्। प्रहरीले चेकजाँच तथा विशेष निगरानी अभियान सञ्चालन गर्ने क्रममा उनीहरूलाई नियन्त्रणमा लिएको जनाएको छ। पक्राउ परेकाहरूबाट विभिन्न प्रकारका लागुऔषध बरामद गरिएको छ भने उनीहरूमाथि थप अनुसन्धान भइरहेको छ। पछिल्ला महिनाहरूमा सुदूरपश्चिम तथा सीमावर्ती जिल्लाहरू लागुऔषध ओसारपसारको ट्रान्जिट बिन्दुका रूपमा प्रयोग भइरहेको भन्दै सुरक्षा निकायले निगरानी बढाएको छ।
सीमावर्ती क्षेत्रमा हुने लागुऔषध कारोबारको एउटा मुख्य आधार नगद कारोबार हो। अपराधी समूहहरूले बैंकिङ निगरानीबाट बच्न नगद प्रयोग गर्छन् र सीमापार रकम आदानप्रदान पनि नगदमै गर्ने प्रवृत्ति देखिन्छ। डिजिटल ट्र्याकिङ नहुने भएकाले अपराधबाट आएको रकम सजिलै प्रयोग गरिन्छ। यस कारण लागुऔषध नियन्त्रणका लागि केवल पक्राउ अभियान पर्याप्त हुँदैन, आर्थिक कारोबारको स्वरूप परिवर्तन गर्नु पनि आवश्यक हुन्छ।
नयाँ सरकारले पुराना सरकारजस्तो केवल पक्राउ र कारबाहीमा सीमित नभई नोट खारेजी तथा डिजिटल अर्थतन्त्र विस्तारको दीर्घकालीन नीति ल्याउनुपर्छ। विशेषगरी सीमा क्षेत्रका पसल, पेट्रोल पम्प, होटल, यातायात सेवा र थोक व्यापारमा डेबिट कार्ड तथा डिजिटल भुक्तानी अनिवार्य गर्न सकिन्छ। सरकारले बैंक तथा भुक्तानी सेवा प्रदायकलाई सहुलियत दिएर प्रत्येक गाउँसम्म कार्ड प्रयोगको सुविधा पुर्याउनुपर्छ। जब दैनिक किनमेलदेखि ठूला कारोबारसम्म डिजिटल माध्यमबाट हुन थाल्छन्, अपराधी समूहलाई नगद प्रयोग गर्न र अवैध कारोबार सञ्चालन गर्न कठिन हुनेछ। यसले लागुऔषध कारोबार नियन्त्रणसँगै पारदर्शी अर्थतन्त्र निर्माणमा पनि सहयोग पुर्याउनेछ।
